Бөек шагыйребез әсәрләрен сәнгатьле уку белән генә чикләнмәде укучылар: сәхнәдә де­корацияләр алышынып кына торды, Тукай әкиятләрендәге Шүрәле, Былтыр, Су анасы, Күбәләк, Кояш, Кәҗә, Сарык, Бүре һәм башка персонажлар, “җанланып”, тамашачы алдына чыкты.

“Тукай сүзе төрле телләрдә” номина­ция­сендә шагыйрьнең иҗат җимешләре татар, урыс, башкорт, инглиз тел­ләрендә яңгырады. Бәй­гедә Иске Баеш, Мәскәү, Суккул, Күккуян, Иванай урта мәктәпләре укучылары чыгышын тамашачылар көчле алкышларга күмде.

Бәйге нәтиҗәләре буенча җиңүче исемен Иске Баеш урта мәктәбенең 5нче сыйныф укучысы Диана Фазлыева яулады. Аның башкаруында “Шүрәле” әкиятен зал тын да алмый әсәрләнеп тыңлады. Икенче урын, шулай ук, Иске Баеш мәктәбендә: 9нчы сыйныф укучысы Айгизә Фазылова “Су анасы” әсәрен башкорт телендә соклангыч итеп башкарды. Өченче урынны “И, каләм!” әсәре белән Маядык урта мәктәбенең 9нчы сыйныф укучысы Урал Каһар­манов алды.

Иҗади төркем булып чыгыш ясаучылар арасында жюри әгъзалары беренче урынга лаек булырлык чыгыш юк дип билгеләде. Ә менә икенче һәм өченче урыннарны Мәскәү авылы урта мәктәбе укучылары алды.

Тиздән бәйге җиңүчесе Диана Фазлыева район данын республика күлә­мендә яклаячак. Аңа уңышлар телик!

Источник: http://kiziltan.ru/iskra/5319-tukay-bezne-kellrd.html